工作上谈政治良心?

2019-10-08

工作上谈政治良心?

Zulu Lo 摄

就住最近热门既时事话题,一番到公司听到同事议论纷纷,民意一面倒,听唔出大家既真心假意,究竟係实在认同定係为左奉承而附和?相信係后者居多,职场上,众人既意见就係你既意见。

即使係工作上既小事,大家对于出现唔同做法时一般都会有微言,更何况係关乎整个社会既大事?问题在于提出讨论既係边个。听到有位同事分别对上司同埋自己同事表达意见既唔同版本,「Jade,个interview齐人未?开始左未?唉,明明今日早左出门口,一去到旺角又塞左好耐车先返到黎,离晒谱架,⋯⋯阻住晒啲路,佢地得闲姐,唔好搞到其他人啦!你话係咪?」,Jade即时对答如流,好似一早準备好答案,「早晨经理,个interview未开始唔洗急,我身同感受啊,而家好多巴士改晒路好唔方便,日日都要专登搭多程车先番到黎,车费俾多左都算啦,呢班后生仔未出黎做过野,完全唔了解生活唔简单既道理,而家可以唔洗返学,又有得训马路,可能仲觉得好得意好好玩。」经理一边听一边执拾文件,听完满意地点点头,然后急急脚落楼下in人。

Jade岩岩坐番低係自己位,有两个佢相熟既文员朋友拎住份免费报纸係门口入紧黎office,大大声讲:「你睇下,今日头条又係讲班学生啊,政治既野我就唔係好识啦,不过佢地咁细个就出黎争取民主,睇下啲图,阴鬼公,无啖好食,又要训街,都咁坚持,呢种勇气我地就无啦!」,Jade语气突然一变,「讲真啊,有时见到新闻都几心痛,虽然无亲身係现场睇下咩情况,但网上咁多片睇到,有啲学生哥冒住会被推撞受伤既危险去支持,仲有啲老人家主动整啖热饭俾佢地落肚,我地又做过啲咩呢……」Jade叹左一口气,欲言又止,佢发觉自己已经唔小心讲多左,四周观望有几多同事听到佢呢番说话,计算住会唔会俾人用黎做茶余话题。

大家都明白,认真就输了,係工作间唔应该透露太多政治立场。你在明,但你永远唔知有几多人在暗窥视你,无谓中计。讲政治良心,唔一定要刻意显露俾其他人知道,係职场上好难搵到真既正同伴畅所欲言,咁就不如先隐藏起黎。

如果老闆或者上司问起你,虽然你个心好想去说服佢地,不过谂多一秒,会唔会因为一番既独白而影响你多年黎一直扮演既形象?佢地既接受程度你有信心準确估计得到吗?係呢个时候,先令佢地讲出想法,再为佢地粉饰一下,带过就算,千万唔好令政治事件成为你地之间重要既话题,否则只会逼你表态。如果有你明知係伪善既同事尊登问你睇法,不妨做个中立角色,等佢地捉摸唔到你本人真正偏向。工作上无必要讲政治良心,反正大家只係受薪既伙伴关係,我点解要咁老实拎个良心出黎俾你去批判呢?